Händ ihr`s ghört, das wäg em Suter?
Öppis isch do nümme luuter.
D`Banke chratze i de Hoor.
Isch es ächt au würkli wohr?
Das git z`rede bi de Lüüt,
aber i, säge nüüt!

S`Meiers heige au nüt z`lache.
S`goot halt do um gewüssni Sache,
s`klappt nümme bi dene beide,
hoffentli tüends nid no scheide.
Das git z`rede bi de Lüüt,
aber i, i säge nüüt!

S`Huebers Max im Schmitterank
gfallt mer nümm da isch doch chrank,
het z`viel gröikt, und nid z`vergessen:
Er het wie`n Dröscher g`ässe.
Das git z`rede bi de Lüüt,
aber i, i säge nüüt!

Was i no ha welle froge:
Stimmt`s ächt s`Pfarrers Bueb
nähm Droge?
Und em Lehrer Vogelsanger
sini Tochter seig schynts schwanger.
Das git z`rede bi de Lüüt,
aber i, i säge nüüt!

Nei, was d`Lüüt nid alles brichte!
Weisch, und grad wäge settig Gschichte
chöntes eim no nochenäh,
grichtlich mein i, säb chönts gäh.
Das gäb z`rede bi de Lüüt,
ebe, dorum säg i nüüt!